DSE中文卷四｜口試小貼士－內容篇

#HKDSE  #中文   #說話

雖然話廣東話我地由細講到大，但係到考說話既時候點解都會表現得唔好呢？到底係咪有啲地方我地冇留意呢？定係有啲咩我地準備得唔夠呢？雖然小編考DSE已經係兩年前既事啦，但係只要大家留意小編接落黎提到既一啲失分位，同埋一啲最後要準備既野，相信大家都可以好似小編一樣用個口摘兩粒星星落黎架！

失分位：中國文化根基薄弱

每年考評局都會整合一啲考生常犯既錯誤出黎。當中最常出現既問題就係考生係中國文化根基上較為薄弱，有啲時候做古語題既時候會唔知題目講乜。

例如係2016年其中一題：「古人重孝，下列哪一項傳統孝親行為更值得提倡？試談談你的看法。慎終追遠晨昏定省」。

要答問題，同學先要明白「慎終追遠」同「晨昏定省」兩者既意思，目的以及分別。唔少同學因為唔明白晨昏定省點解而最後答到離答架（當中好多同學會讀錯「省」字添，其實係讀「醒」）！

解決方法：解字

當大家面對一啲唔識解既古語或者選項既時候，不妨試下解字。

因為好多時大家其實逐個逐個字解係解得出既，只係係佢地合埋一齊既時候睇唔明。呢個時候大家只要諗下每一隻字既意思，再係果隻字既下面寫低，唔識既就Skip左佢，當你寫好曬既時候就睇下啲解釋合埋會係咩意思。

例如係：
晨 昏 定 省

早上    下午／晚上    安定／平定／    跳過

當你寫好曬啲解釋你就會發現前面兩隻字係時間，而後面應該就會係兩個動作。大家就可以諗下，有啲咩朝早做同夜晚做而表達到「孝」呢？從「昏」同「定」既意思中，小編就會諗到「夜晚令到雙親得到平定＝服侍就寢」。咁朝早呢？應該就會係打招呼講早晨啦！

結論就係，用呢種方法未必一定岩，但係當你毫無頭緒既時候點都比到一啲方向你既。

失分位：亂用例子／未能解釋例子

好多時老師都會同大家講，例子係好重要既。所以大家會係討論中拋極大量既古語出黎。但係同學係引用古語既時候會並未真正理解當中意思，最後引錯古語，攞唔到分之餘仲會失分添。又或者舉出一啲古語或者例子但係之後並冇詳細解釋例子同論點之間既關係，結果講左又拎唔到分，仲嘥左時間添！

解決方法：

當你係準備時間寫低左個例子之後，請大家係隔離大大隻字寫低你想藉住例子而帶出既論點或者係問題，然後再圈住佢。咁就可以提醒自己講完例子之後唔好唔記得重申一次你既目的。而古語黎講就簡單得多啦，你冇100%確定自己明白既話，就寧願唔好講啦。

而係例子方面小編都有少少貼士可以比大家既，大家可以上網搵定一啲名人故事，成語故事或者諺語，例如係：李嘉誠－白手興家，唔一定靠父蔭／蘇樺偉－有缺陷唔代表你會輸比人／牛下女車神－只要唔放棄，所有事都會成功（只要有恆心，鐵柱磨成針）等等。

一黎故事比較易記，二黎大家一聽就會明，咁就唔怕人地唔知你個例子同論點有咩關係啦！所以大家可以搵多啲，寫落筆記簿，考之前再望一望就唔怕冇例子用啦。